120 ka balay naugdaw

Cebu - Gibabanang moabot sa 120 ka mga panimalay ang naugdaw atol sa sunog nga miulbo mga alas 4:01 diha sa sitio Nava barangay Mambaling dakbayan sa Sugbu.

Ang maong sunog giisa sa kabomberuhan ngadto na sa Task Force Alpha (sunod sa 3rd alarm) alarm ug nakontrolar sulod sa 45-minutos.

Si FO3 Nilo Daculan fire investigator sa sa Cebu City Fire Department nga gikahinabi sa Banat News nitug-an nga adunay 70 ka mga panimalay’g naugdaw upat sad ang partially burn, ug 50 ka mga payag-payag sa mga Badjao ang naugdaw sa hingpit.

Matud pa ni Daculan nga ang maong sunog naggikan sa panimalay sa usa ka Badjao nga ginganlan lang og “Mobin.”

Sumala pa niini nga tulo ka mga silingan sa maong Badjao didto sa atbang nga sila si Lino Baclayon, Beth Abraham, ug Melcia Padernal ang nikunpirmar nga didto gikan ang usa ka sipangbuto sa panimalay ni “Mobin” nga gisundan sa pag-ulbo sa kalayo.

Gitataw usab niini nga posibleng sound system usab ang hinungdan gumikan kay nagpaatukar pa sulod sa panimalay ni Mobin sa wala pa mahitabo ang sunog.

Hinuon sa pagkakaron dili pa matino kun pila gyud ang kinatibuk-ang danyos sa maong sunog.

Gitinguha nilang imbitahon si Mobin aron makuhaan sa iyang habig labot na sa maong insidente.

Giangkon niini nga nakahatag gyud og problema sa kabomberuhan ang kahagip-ot sa mga dalan sa nahisgutang lugar ug pagkontrolar sa mga tawo.

Ang School Principal Alaska Mambaling Elementary School, Carmen Chan, nibutyag sa mga tigbalita nga upat ka class room sa grade 1 ug grade 2 ang hingpit nga naugdaw dihang ang kalayo sa luyong bahin nikaon sa maong building.

Matud pa niini nga adunay unom ka klase matag adlaw ang mga tinun-an sa grade 1 ug grade hinuon ang ilang klase karong Lunes magpadayon.

Gibutyag niini nga nagpahigayon silag review sa National Achievement Test sa mga kagahapong adlawa dihang ilang nabati luyo sa eskwelahan ang pagka-kanta sa mga tawo sa usa ka videoke.

Apan nakadungog nalang silag usa ka sipang buto diha-diha gisundan nalang kini sa pag-ulbo sa sunog hinuon way naangol nga tinun-an nga diha sa tunghaan gumikan kay destansya ang bag-ong building sa nasunogan.

Ang tsirman sa Cebu City Disaster Coordinating Council konsehal Gerry Carillo nga nahinabi sa Banat News nagkanayon nga duna napulo ka mga tawo ang naangol ug sagad niini mga bata tungod sa mga sisi sa seawall atol sa dinaganay padulong sa South Road Property (SRP). - Guam Logroño (BANAT NEWS)