Inahan gitigbas patay 7-buwan anak angol

Cebu - Patay ang usa ka 19-anyos nga inahan samtang natigbasan sa ulo ang iyang pito ka buwang anak diha sa sitio Pulang Yuta Lower Natimao-an lungsod sa Carmen kagahapon pasado ala una sa buntag.

Si Len Into, 19, lumulopyo sa nahisgutang lugar patay ng napalgan sa mga silingan diha sulod sa ilang balay samtang nagkadugo sad ang anak niining si Rose Jaysinth nga may duha ka samad tinigbasan sa ulo. 

Ang inahang si Into nakaangkon og daghang samad tinigbasan sa kalawasan nga maoy gituuhang nakaingon sa hinanali niining kamatayon samtang gidala sa tambalanan ang anak niini sa mga silingan.

Si SPO1 Danilo Laurente sa pakighinabi sa Banat News mibutyag nga nakadungog ang mga silingan sa mga biktima og singgit gikan sa balay sa naulahi nianang pagkakaadlawon.

Ang mga biktima diha mangatulog sa ilang kwarto dihang gisulod sa usa ka wala mailhing mamumuno ug walay kukaluoy nga mitagod-tagod sa duha.

Tungod sa mga singgit sa inahan nga nagpakitabang sa mga silingan daling miikyas ang mamumuno ug mao nalay naabtan sa mga silingan ang duha nga pulos na nagkadugo apan nagbuy-od na ang inahan ug ang usa sa mga kamot niini gikatahong nagkawil-kawil nalang.

Nasuta nga wala diha ang bana sa biktima nga usa ka van salesman nga si Marlon Into nianang pagkahitabo tungod kay kini nagtrabaho atol sa pagkahitabo.

Wala pa masuta sa kapolisan sa Carmen kung unsay motibo sa krimen, apan usa sa ilang gisusi karon mao ang nawagtang nga cellphone sa biktima. - Lesley Caminade (BANAT NEWS)