Cebu - Usa ka “sisterhood agreement” ang gitukod tali sa dakbayan sa Mandaue ug sa Bacau, Romania.
Kini human moduaw ang mga opisyales sa Bacau sa buhatan ni Gobernador Gwendolyn Garcia aron kini imbitahon nga mosaksi sa pagpinirmahay sa maong kasabotan tali sa Dakbayan sa Mandaue ug Bacau Romania karong Mayo.
Ang maong delegasyon gipangulohan ni Mayor Romeo Stavarache sa Bacau City ug Romanian Ambassador sa Pilipinas Valeriu Gheorghe.
Atol sa maong tigom si Garcia nagkanayon nga ang paghiusa sa puwersa sa Romania ug Cebu mahimong mapalapdan pa sa umaabot nga panahon.
Mipadayag si Gheorghe nga nadasig siya pag-ayo sa pagtukod og sisterhood tali sa iyang nasud ug sa lalawigan sa Sugbo tungod sa nakab-ot nga kalamposan sa Sugbu ubos sa administrasyon ni Gobernador Garcia.
Kun mahinayon ang gobernador, iyang dad-on ang tanang miyembro sa Provincial Board didto sa Romania aron palapdan ang kooperasyon tali sa duha ka siyudad. - Rey Pasaporte (BANAT NEWS)