Walo ka balay naugdaw

Cebu - Walo ka panimalay ang hingpit nga naugdaw sa sitio Katsilaan sa M.L. Quezon Boulevard kagahapon pasado alas 2 sa kaadlawon.

Ang kapolisan sa Carbon Police Station maoy daling miresponde sa maong panghitabo ug mitawag sa kabomberohan sa dakbayan.

Diin nasayran nila nga ang kalayo nagsugod sa panimalay sa pamilyang Bering nga giingong nagsugod dihang ang ilang lamparilya natagak gikan sa lamesa ug mikatap sa balay ug niugdaw sa kabalayan sa mga silingan.

Matud pa ni Cebu City Fire Marshall Ismael Codilla nga gipaubos lang ang maong sunog sa first alarm ug napawong human sa 10-minutos, wala hinuoy nataho nga nasamdan o naangol sa insidente.

Subling mipahimangno si Codilla sa publiko nga dili magpataka og biya sa mga lamparilya o bisan unsang butang nga makamugna og sunog.

Sa pagsulod ning tuiga, nakatala na ang kabomberuhan og upat ka insidente sa mga sunog dinhi sa dakbayan samtang nagkaduol palang ang bulan sa Marso nga maoy gideklarar nga labing init ang panahon ug gideklarar kining Fire Prevention Month. - Lesley Caminade (BANAT NEWS)