Cebu - Gipusil-patay atol sa paggawas sa ilang pinuy-anan ang usa ka newsboy nga paingon untang mokuha sa iyang mga baligyang newspaper kagahapon sa ala 1:15 sa kaadlawon sa dalan Jose Rizal, barangay Poblacion-1 siyudad sa Carcar.
Ang biktima mao si Felix Dialimas, 59, nagpuyo sa nahisgutang lugar ug usa ka newsboy samtang wala pa mailhi sa kapulisan ang nag-inusara nga suspek sa pagsulat niining balita.
Ang gwardiya sa Greenbank nga si Lorenzo Oswa maoy nakakita sa maong panghitabo nagkanayon sa kapolisan nga sa sayo pa nabantayan na niini ang maong suspek nga nag-estambay nang daan sa lugar pipila ka oras sa wala pa moabot ang biktima.
Matud pa ni PO3 Reynaldo Fuentes sa Carcar City Police dihang nahinabi sa Banat News gikalitan og duol sa suspek ang biktima kinsa mao pay paggawas diha sa karsada gikan sa ilang balay.
Tulo ka higayun gipusil sa suspek ang biktima diha sa bukobuko nga nilapos sa iyang tiyan agi sa wala matinong kalibre sa armas ug daling midagan pahilayo.
Ang biktima gidali pagtabang ug gidala sa Carcar City District Hospital apan gideklarar ni Dr. Allan Mercado nga Dead on Arrival (DOA). - Darrel Carumba (BANAT NEWS)