Empleyada sa MEPZ gitipi sa ka-text

Cebu - Usa ka babayeng trabahante sa Mactan Export Processing Zone (MEPZ) nga na-missing sulod sa pipila na ka adlaw ang napalgang patay na nga nagsugod na og kadugta ug gituohang gilugos ug gipatay sa wala pa mailhing lalaking gikatahong iyang nakaila pinaagi sa text ug gikatagbo diha sa North Reclamation Area sa dakbayan sa Mandaue.

Ang biktima giila nga mao si Emily Nuneza, 24, lumad nga taga barangay Tumugpa sa lungsod sa Tuburan ug kawani sa usa ka establisamento sa Mactan Export Processing Zone (MEPZ) sa barangay Basak, dakbayan sa Lapulapu.

Gisusi na karon sa kapolisan ang pangalan sa lalaking maoy gidudahang nipatay sa biktima nga iyahang nakaila pinaagi sa usa ka ‘wanted textmate’ nga programa sa usa ka sibyaanan sa FM ug maoy giingong ulahing kaestorya niini diha sa nahisgutang dapit sumala sa higalang babaye niini.

Si Insp. George Aniñon, hepe sa homicide section sa Mandaue City Police Office (MCPO) nga nahinabi sa Banat News miingon nga nadugta na ang patay’ng lawas sa biktima nga gigapos ang mga kamot ug hubo na ang ubos nga sapot ug gitangtangan na sa iyang bra.

Ang gwardiya sa Douglas Uytingco Trucking nga si Joey Mancio sa maong dapit maoy unang nakadiskubre sa patay’ng lawas sa biktima tungod sa pagpangalisbo sa baho niini.

Sa gihimong imbestigasyon sa MCPO, niadtong Enero 21 unang nakigkita ang biktima sa maong suspek nga iyang nakaila pinaagi sa usa ka FM station diin ang mga dalaga ug ulitawo magkahigalaay ug magbinayloay og mga numero sa cellphone aron mamahimong ka-textmate.

Ang biktima ug ang suspek diha magkita sa Mactan Shrine sa dakbayan sa Lapulapu ug giingong nagbinayloay og mga cellphone sa wala pa maklarong hinungdan.

Matud pa ni Aniñon nga tinguha sa biktima nga makuha og balik ang iyang cellphone niini nga gidala sa maong lalaki hinungdan nga nagpakuyog kini sa iyang ka-boardmate nga babaye aron pakigkitaan ang suspek diha sa reclamation area sa dakbayan sa Mandaue niadtong Enero 23 sa hapon.

Ang kaubang babaye sa biktima (ngalan gipugngan sa kapolisan) mitug-an nga gipahimangnoan siya sa maong lalaki nga dili ipahibalo sa buhatan sa kapolisan ang pagdala niya sa cellphone niini.

Subay sa gitug-an sa ka-boardmate nga nagsakay sila og traysikad gikan sa highway sa ilang pagpaingon sa reclamation area dihang gipakanaog kini diha sa usa ka gasoline station tupad sa usa ka fast food chain diha sa NRA tungod sa kabalakang masuko unya ang textmate nga nagdala siya og kauban.

Si Aniñon nagkanayon nga gikan sa gitindugan sa boardmate makita niini ang biktima samtang nakig-estorya sa maong lalaki diha sa unahan, apan gumikan sa mga naglabay-labay'ng mga sakyanan nalipat ang ka-boardmate sa biktima ug nawagtang sa iyang panan-aw ang duha.

Daling gisusi sa amiga sa biktima ang dapit ug nanawag sa iyang uyab aron magpatabang pagpangita niini apan nagabhian na lang sila og libot-libot sa dapit wala na nila kini igkita hangtod nga nakahukom sa pagpauli sa ilang gipuy-an nga wala lamang usab motaho sa kapolisan.

Si Aniñon miingon nga milungtad na og lima ka adlaw nga wala na makatambong sa iyang trabaho ang biktima hangtod nga nakaplagan na lamang ang patay niini sa maong lugar. – BANAT NEWS