'Salisi' nakaigo

Cebu - Usa ka nurse ug graduating nga nursing student nidangop sa buhatan sa Theft and Robbery Section (TRS) sa kapulisan sa dakbayan sa Sugbu kagahapong adlawa human nabiktima sa ‘Salisi Gang” sa managlahing dapit ning dakbayan sa Sugbu karon lang semanaha.

Ang unang biktima giila sa kapulisan nga si Josephine Estares, 23, taga Agusan Sur ug nag-abang og boarding house diha sa may Don Mariano Cui ang gisakiyuhan sa iyang mga butang ug salapi niadtong Enero 24 sa hapon ning buwana.

Samtang ang suspetsadong babaye gituuhang sakop sa Salisi Gang nagpaila lang sa pangalan nga si Riza Sebastian giingong trabahante sa call center dinhi sa dakbayan sa Sugbu.

Si Estares nakuhaan sa iyang laptop nga mokantidad sa P30 mil, P20 mil nga Ipod, P8 mil   nga cash, human usab giingong gilipat lang siya niini samtang naligo sa banyo.

Matud pa niini nga tulo palang ka adlaw’ng nakauban niya ang suspetsado sa boarding house ug gipasaligan usab siya niini nga tabangan sa pagpangita’g trabaho.

Apan dihang naligo siya sa banyo gilipat lang siya niini ug wala na gyud mopakita ug dihang iyang gitan-aw ang iyang bag pulos nalang mga ginunting nga pantalon ang sulod niini.

Samtang niadtong Huwebes sa udto usa ka Mae Fara Bermejo, 21, graduating sa Nursing ug taga San Fernando ang nakuhaan usab sa iyang P90mil nga laptop, P14 mil nga MP3.

Usa ka nagpailang Clarissa nga trabahante usab sa call center dinhi sa dakbayan sa Sugbu ang gitumbok nga suspetsado sa pagsakiyo sa iyang mga butang human nakasulod sa ilang boardinghouse sa Sto. Niño Village barangay Banilad ning dakbayan nga gipanag-iya ni Atty. Fritz Quiñanola.

Matud pa ni Mae Fara nga nakasulod ang maong babaye human nitugot ang front desk sa maong boarding house nga si Cherry Abellanosa nga motan-aw sa lawak nga abangan sa suspetsado.

Apan dihang nakasulod na sa iyang lawak gibiyaan sa front desk ug gikuha ang iyang mga butang dihang igo lang nisaad nga mobalik kay mag-withdraw sa iyang ibayad sa abangan.