Vendors sa night market gi-demolis

Cebu - Nabulabog ang ubay-ubay nga mga manindahay sa night market diha sa dalan Manalili ning dakbayan sa Sugbu kagahapong adlawa dihang kalit nga nangabot ang mga sakop sa Market Operations Division uban sa demolition team alas 7:00 pa lang sa buntag ug nisakmit sa ilang mga baligya.

Matud ni City Market Administrator Racquel Bohol-Arce nga mga gahi og ulo ang nahisgutang mga vendors ug mibaliwala lang sa ilang mga pahimangno ang ilang gipang-demolish.

“Atong gi-clear ang mga vendors kay naanad na sila ba nga sa gusto lang nilang mamauli o sa mahalin lang ang ilang mga paninda,” sumala ni Arce.

Ang mga manindahay sa night market diha sa Carbon area gitugutang makaladlad sa ilang mga baligya gikan sa alas 6:00 sa gabii hangtud lang sa alas 6:00 sa buntag.

Giuli ra hinuon ngadto sa mga vendors ang nagkadaiya nilang paninda apan kini gipaubos una sa seminar ug gipabayad og P350 nga multa.

Mokapin sa P11 mil ang nakolektang multa gikan sa mga manindahay nga nagagikan pa sa nagkadaiyang dapit sa habagatan bahin sa Sugbu.

Partikular nga gipamaligya sa mga vendors nga giingong mga molupyo sa Minglanilla, Naga, San Fernando ug Carcar, mao ang mga lamas, utanon ug mga lagutmon. - Elly Bolonos (BANAT NEWS)