Gibuk-ag ulo atubangan sa anak

Cebu - Usa ka amahan ang gipauwana’g mga bala ug namatay atubangan mismo sa iyang anak gawas sa ilang panimalay mga alas 6:00 sa buntag sa barangay Panangban lungsod sa Compostela niadtong Miyekules.

Ang namatay diha-diha gilayon giila sa kapulisan nga si Gil Capua Oliva, 52, nagpuyo sa nahisgutang dapit nakaangako’g samad pinusilan sa iyang ulo, walang bukton ug walang tiil.

Samtang ang nag-inusarang mamumuno kinsa daling nakasibat human sa krimen wala pa gyud mailhi ug gipangita pa karon sa kapulisan.

Sa imbestigasyon ni PO1 Erwin Balverde, gikatahong diha sa gawas sa panimalay ang biktimang si Gil uban sa iyang anak nga si Igil Oliva.

Dihang kalit lang nibutho ang suspetsado nga wala mailhi ug sa walay igong rason gipusil ang biktima makadaghang higayon hinungdan sa hinanali niining kamatayon.

Wala pa matagbaw ang suspetsado gipusil usab makaduha ka higayon ang anak nga si Igil apan wala maigo ug nakadagan.

Si SPO2 Ramon Perales sa Compostela Police Station nga gikahinabi sa Banat News nagkanayon nga wala pa gyud masuta sa ilang imbestigasyon kun unsa ang motibo sa pagpamusil. - ug Lesley Caminade (BANAT NEWS)