Cebu - Pag-umangkon sa mayor sa San Francisco, isla sa Camotes nadakpan sa kapolisan human manghasi ug nagpabuto sa iyang armas niadtong Martes sa alas 10:40 sa gabii sa sitio Pamatasan, barangay Northern Poblacion sa maong lungsod.
Ang pag-umangkon ni Mayor Alfredo Arquillano nga nadakpan mao si Margarito Arquillano, 36, taga barangay Western Poblacion ug operator sa heavy equipment sa San Francisco. Nakuhaan kini og .45 kalibre, lima ka kabhang sa bala, usa ka buhing bala, usa ka magazine, tulo ka tip-sheets ug duha ka tally sheets sa jai alai.
Si Margarito miaksiyon og sukol nilang PO1 Ket Barameda ug PO1 Winston Ybañez, apan nakuptan gyud kini samtang nagsakay sa iyang motorsiklo.
Apan si Margarito mibasol sa “yawa” sa iyang pagkasikop human kini miingon nga giyawaan kini hinungdan nga ganahan kaayo kining mopabuto og armas.
Matud ni Cebu Provincial Police Office director Sr. Supt. Carmelo Valmoria nga usa ka Fe Relampagos nga tag-iya sa tindahan diin nag-inom ang pag-umangkon sa mayor maoy mireklamo nga gi-harass siya ni Margarito dungan ang pagpabuto sa armas niini.
Sumala ni San Francisco Police Station chief Sr. Insp. Ciriaco Larrobis Jr. nga hubog kaayo si Margarito atol sa hitabo. Sa dihang gisita sa kapolisan wala kini napakitang lisensiya sa armas hinungdan nga gibalhog kini sa karsel sa kapolisan.
Gipasaka kagahapon adlawa ang kasong indiscriminate firing ug illegal possession of firearms batok ni Margarito.
Sa dihang gipangutana kun nalambigit ba sa ilegal nga sugal si Margarito tungod sa nakuhang tally sheets ug tipsheets, mitubag si Valmoria nga ila pa kining susihon.
Niadtong miaging adlaw, ang executive secretary ni Mayor Arquillano nga si Rey Tindoy nadakpan sa Provincial Intelligence Branch (PIB) pinanguluhan ni Chief Insp. Elma delos Santos ug nakuhaan og daghan kaayong tally sheets, tipsheets, Kuwarta Padala nga resibo alang sa ngalan nga Christopher Ong, mga listahan sa kolektahonon ug P27 mil nga salapi.
Sa dihang gi-imbestigar ni PO3 Mario Abasolo sa San Francisco Police Station si Margarito, mialegar kini nga nayawaan lang siya hinungdan sa iyang pagpabuto.
Wala hinuon motuo si PO3 Abasolo sa pasangil ni Margarito nga giyawaan siya.
Si Larrobis nagkanayon nga bisan gihangyo siya sa kabanay nga dili ihinayon ang kaso tungod kay walay interes si Relampagos pagpasaka og kaso, apan wala siya mosugot. - BANAT NEWS