Anomaliya sa Ms. Cebu sutaon

Cebu - Pormal nang sugdan ugmang adlawa ang imbistigasyon sa kontrobersiya nga nitumaw atol sa pagpahigayon sa Miss Cebu 2009.

Kini maoy gipahibawo ni Cebu City Councilor Gerry Carillo, ang chairman sa gihulma nga komitiba nga maoy gitahasan pagsusi sa maong kontrobersiya.

Matud sa konsehal nga nahan-ay na sa ilang komitiba ang mga lagda alang sa gitakda na nga pagsugod sa fact-finding inquiry.

 Napadalhan na usab og notisya sa komitiba ang mga tawo nga gituohang makahatag og katin-awan sa nitumaw nga kontrobersiya.

Nabulabog ang Miss Cebu 2009, dihang lain ang gitawag nga texters’ choice award winner ug dili ang tinuod nga mananaug niini nga si Kimberly Therese Burden.

Dili madawat ni Burden ingon man sa iyang pamilya ug mga supporters ang maong hitabo, hinungdan nga miprotesta sila.

Gumikan sa kasagmuyo, giuli na ni Burden ang iyang mga nakuhang mga ganti atol sa nahisgutang beauty pageant isip second runner-up.

Gipasalig sa konsehal nga patas ang ilang himoon nga imbistigasyon ug kuhaon ang tanang anggulo sa nahitabong kontrobersiya. - Elly Bolonos (BANAT NEWS)