Joavan mipalta sa bista

Cebu - Napakyas sa pagtunga si Joavan Fernandez, ang anak ni Talisay City Mayor Socrates Fernandez sa gikatakdang arraignment niini sa kasong robbery didto sa sala ni RTC 7 branch 22 Judge Manuel Patalingjug kagahapon sa buntag.

Wala usab makatunga sa maong arraignment si manlalaban George Bragat, ang abogado sa batan-ong Fernandez ug bugtong ang prosecutor lamang sa dakbayan sa Talisay ang nakatambong sa maong bista.

Napakyas usab sa pagpahibawo ang kampo sa anak sa mayor sa hinungdan sa ilang pagpalta sa maong arraignment bisan kun kaniadto pa sa miaging tuig kini itakda.

Tungod niini, giuswag nalang ni Judge Patalingjug ngadto sa Abril 1 ning tuiga ang maong bista.

Nasayran nga giakusahan si Joavan nga maoy mikawat sa DVD player ug usa ka television set sa usa ka vulcanizing shop nga nahimutang sa Tabunok, dakbayan sa Talisay niadtong nakalabay nga tuig agi og bayad sa gikawat nga ligid sa sakyanan sa iyang amahang mayor nga gipabulkit sa maong shop.

Atol usab sa maong giingong pangawat ni Joavan sa maong mga butang, giingong gidagit usab niya ang duha ka mga trabahante sa maong shop unya gipangulata pa kuno, hinungdan nga nag-atubang usab kini og laing kasong pagpamun-og ug panagit sa korte. - Chester Abadilla (BANAT NEWS)