Pamilya sa gipatay gihulga'g Granada

Cebu - Gibati og tumang kahadlok ang pamilya sa babayeng gigulgol sa bana tungod sa bahad sa suspek nga bana sa biktima nga labayon og granada ang haya niini niadtong miaging gabii sa barangay Poblacion-1, lungsod sa Tuburan ug nangante pa nga dili motahan hangtud nga dili niya mapatay ang maguwang lalaki sa biktima.

Matud pa ni PO2 Noel Rodriquez sa Tuburan Police dihang nahinabi sa Banat News alas 7:00 niadtong Lunes sa gabii nitawag sa ilang hotline ang pamilya sa biktima ug nisumbong sa pagpanghulgang nadawat gikan sa suspek pinaagi sa text message.

Ang maong text message nga nadawat sa kabanay sa biktima gikatahong nanghulgang labayon sila og granada, mga kabanay sa biktimang si Wenna Salundaga nga nagbilar diha sa haya niini, dugang bahad mao ang di pagtahan sa suspek nga si Rolando Salundaga ug patyon niini ang maguwang sa asawa nga si Titing.

Ang biktimang si Salundaga, 21, graduating na unta sa kursong education sa Cebu State College of Science and Technology (CSCST) Tuburan Campus karung bulan sa Marso gigulgol sa suspek niadtong Biyernes sa buntag atubangan sa ilang wala pay tuig nga anak.

Matud pa ni PO2 Rodriquez nga ang suspek naglagot sa maguwang sa biktima nga si Titing tungod kay subay sa pamahayag sa kabanay niini, kini maoy migasto sa biktima pagpatungha sa kolehiyo bisan og kini naminyo na.

Ang mga kabanay sa biktima nangayo og pakitabang sa mga polis tungod sa kahadlok nga tinud-on sa suspek ang bahad niini. – BANAT NEWS