Iranians nabalaka sa ilang seguridad
Cebu - Ambasador sa nasud sa Iran mibisita sa buhatan ni Acting Mayor Michael Rama gumikan sa pagkaalarma sa ilang nasud sa gidangatan sa usa sa ilang mga tinun-ang gipatay sa milabay'ng semana pipila ka metros sa ilang balay sa barangay Capitol Site nga nakapabalaka usab sa seguridad sa Iranian Community sa dakbayan sa Sugbu.
Kagahapong adlawa, nibisita kang acting mayor Michael Rama si Iranian Ambassador Ali Mojtaba Rouzbehani ug nangayo’g kasiguruhan sa seguridad sa mga Iranian nationals nga nagpuyo dinhi sa dakbayan.
Apan ang acting mayor nipasabot ngadto sa ambassador nga siya dili makahatag niini og kasiguruhan tungod kay ang krimen giingong dili kapugngan, apan mipasalig si Rama ngadto sa ambassador nga siya seryoso pag-atiman sa problema sa kriminalidad dinhi sa siyudad.
“I said, I cannot be in control of the minds of others, if crimes will be committed, there will always be a crime, everywhere, anywhere,” sumala ni Rama.
Apan taliwa niini gipadayag sa acting mayor nga siya kanunay nga nipahimangno sa kapulisan sa pagtuman sa ilang katungdanan lakip na ang kasulbaran sa mga krimeng nanghitabo sa dakbayan lakip na ang pagpusil-patay kang Ashkan Aminlan.
Nasayran nga ang siyudad dunay kapin sa 300 ka Iranian nationals ug kini gusto sa ilang ambassador nga kahatagan og igong proteksyon.
Sa pikas bahin, gitahasan na ni Rama si acting vice mayor Hilario Davide III nga pakigtagboan ang tanang langyaw nga mga tinun-an sa dakbayan aron kahatagan og dugang pahimangno partikular na sa ilang seguridad subay usab sa ilang pagpuyo dinhi sa siyudad.
Ang acting vice mayor nga mao usab ang acting chairman sa Police Coordinating and Advisory Council (PCAC) dali usab nga nitubag sa gihatag ni Rama nga tahas ug ugmang adlawa, gitakdang sugdan ni Davide ang pagpakigtagbo sa mga langyaw'ng tinun-an nga naglakip na usab sa mga Iranian nationals. – BANAT NEWS
- Latest
- Trending
