Polis di motambong sa bista ipapriso

Cebu - Mibahad si Provincial Board member Victor Maambong nga ipapriso ang mga polis nga   mapakyas pagtunga sa bista kon husay isip prosecution witness sa kaso nga may labot sa ilegal nga drugas.

Kini human siya makadawat og taho nga matud pa daghang mga polis ang mapakyas pagtunga sa hearing sa kaso nga moresulta na hinuon sa pagka dismiss niini.

Matud pa ni Maambong nga usa kini ka dakong kalapasan sa Section 92 (Delay and bungling in the prosecution of Drug cases), ug anaa sa article 10 of the Republic Act 9165 nga nailhang Dangerous Act of 2002.

Si Maambong kinsa usa usab ka manlalaban nagkanayon nga ang mga polis nga mamatud-ang dili motambong sa hearing sa ilang kaso sa drugas, bisan tinuyo o dili tinuyo mahimong mapriso sila og 12 ka tuig ngadto sa 20 ka tuig ug pabayron pa og dili molapas sa P500 mil, ug mag-atubang pa og kasong administratiba.

Gihulagway ni Maambong nga usa kini ka panurambaw sa mga polis nga walay kooperasyon sa kampanya sa kagamhanan sa pagpakiggubat batok sa ilegal nga drugas.

Iyang gipasabot nga ang pagpalta sa usa ka polis gikan sa bista kon husay sa kasong diin siya usa sa mga saksi nga mananakop, mosangpot sa pagka-absuwelto sa maong kaso.

Gumikan niini wala nay kasilotang malapason sa balaod tungod sa sinurambaw nga paagi sa usa ka polis.

Karong panahona miingon si Maambong nga dili na katiawtiawan ang paggukod sa mga malapason sa balaod bahin sa ilegal nga drugas ilabi nga nga si Presidente Gloria Macapagal Arroyo maoy nangulo ning maong kampanya.

Matud pa ni Maambong nga mangayo siya og kopya sa rekord sa mga polis nga mopalta gikan sa husay sa kaso kalabot sa ilegal nga drugas aron sayon nalang niya unya ang pagrekomendar sa pagpahamtang og bug-at nga silot niining mga polisa. -  BANAT NEWS