Inahan, anak gipatay sa Zamboanga

CEBU - Inahan ug anak nga taga Labangon, dakbayan sa Sugbo gipamusil didto sa Zamboanga City sa pamilya sa babaye nga na-asawa sa anak tungod sa matud pa kasuko gumikan sa pagkasakit niini dinhi sa Sugbo.

Namatay gyud ang anak nga si Bernard Topacio, 30, ug samdan ang iyang inahan nga si Christy Topacio, hingkod ang panuigon.

Wala mahibaw-i pila ka sakop sa pamilyang Asid ang mipusil sa mag-inahan, apan ang amahan nga si Muhammad Fali Asid nadakpan sa kapolisan sa Zamboanga City.

Sumala pa sa taho nga ang pamilyang Asid wala makadawat sa nahitabo ni Zoraya nga asawa ni Bernard human kini makuhai sa ikaduhang anak ug nasakit.

Ang mag-inahang Topacio mihatod unta kang Zoraya sa Zamboanga City niadtong Enero 23 sa gabii subay usab sa hangyo sa amahan niining si Muhammad aron adto patambalan.

Ang banay ni Zoraya pinanguluhan sa iyang amahan nga si Asid maoy misugat kanila sa pantalan.

Apan niadtong miaging adlaw samtang nangaon ang mag-inahang Topacio, gitabangan sila og pusil sa kaliwat ni Zoraya pinanguluhan sa amahan uban sa mga igsuon niini nga pareho na karong nangatanggong sa Zamboanga City Police Office.

Ang anak ni Asid nga si Ryan, igsuon ni Zoraya nga giingong apil usab sa mipusil sa mga biktima padayon pa karong gipangita sa kapolisan sa Zamboanga.

Si Jeff Topacio, manghod ni Bernard, nagtuo nga nasuko ang kabanay ni Zoraya sa gidangatan niini hinungdan nga gipamusil ang mga biktima.

“Wala gyud mi magdahom nga ila tong buhaton kay kana si Fali nagsige na man na og anhi dinhi sa siyudad,” sumala ni Jeff Topacio sa dihang nahinabi sa DyHP-RMN Cebu.

“Ingon akong inahan nga daghan gyud og igo akong maguwang, maayo gani siya kay wala ma-intimano, gilipot gyud sila pagpusil,” dugang pamahayag ni Jeff.

Ang patay’ng lawas ni Bernard ingon man ang naangol niyang inahan gitakda nang dalhon dinhi sa Sugbu atol sa pagsuwat ning balita kagahapon.

Matud ni Jeff nga dinhi na sa dakbayan nila pa-operahan ug ipakuha ang bala nga miungot sa lawas sa iyang inahan.

Nabalaka karon ang banay’ng Topacio sa iyang dos-anyos nga pag-umangkon nga anak ni Bernard ug Zoraya nga miuban sa Zamboanga ug giingong wala na igkita human sa hitabo.   (BANAT NEWS)