CEBU - Gihingusgan sa Mandaue City Police Office (MCPO) ang ilang gilusad sa kabarangayan ug mga tulunghaan nga awareness program sa ilegal nga drugas, krimen ug pagpasakop sa mga gang ug fraternity.
Mao kini gibutyag ni SPO4 Leandro Cosedo Jr., Police Community Relation (PCR) officer sa MCPO nga nahinabi sa Banat News kagahapon.
Matud pa ni Cosedo nga nag-una sa ilang gihingusgan ning maong programa mao ang paghatag og igong kasayuran sa mga batan-ong tinun-an sa dakbayan sa mga kadaut nga idulot sa paggamit sa ilegal nga drugas.
Gipasabot niya nga sa paggamit sa ilegal nga drugas tulo lamang ang paingnan sa tawo nga mao ang pagkabalhog sa bilanggoan kun madakpan sa kapolisan, paghilandig sa tambalanan kun malubaan o kaha mapusilan, o masementeryo kun mamatay.
Si SPO4 Cosedo miingon nga ilang gitinguha nga makabaton og kasayuran ang mga batan-on sa dautang epekto sa paggamit sa ilegal nga drugas aron molikay sila niini.
Gitataw ni Cosedo nga gilakip nila sa maong programa ang mga kadaut sa magpasakop og gang o fraternity ilabi na sa wala magtungha.
Matud pa niya nga ang mga wala na magtungha nga kabataan dali kaayong matintal sa pagsulod sa bisyo nga maoy makadaot sa ilang kaugmaon. (Romeo T. Limpangog) (BANAT NEWS)