Babayeng milayat sa jeep namatay

CEBU - Namatay gyud ang usa ka babaye kinsa milayat sa giluwanang jeep niini kay nalisang sa tulisan nga mitulis kanilang pasahero sa maong sakyanan didto sa Mandaue City sa miaging gabii.

Si Arlene Navecilla, 21, dalaga, nga taga sitio Mohon, barangay Tisa, dakbayan sa Sugbu wala kaantos sa nahiagumang bun-og sa iyang ulo gumikan sa pagkapantok niini sa sementadong karsada sa Hernan Cortes, Ibabao, dakbayan sa Mandaue sa pagtugpa niya gikan sa jeep pasaheroan nga iyang gisakyan.

Si Navecilla didto mamatay sa Mandaue District Hospital diin siya malandig human sa maong hitabo.

Maoy hinungdan nga kasong robbery ug murder ang gipasaka karon sa kapolisan batok kang Loreto Surban Jr., ang suspetsadong tulisan kinsa nagtingkagol na karon sa prisohan sa Mandaue City Police Office.

Si Surban kauban kining pasahero sa usa ka public utility jeep (PUJ) nga giluwanan usab sa biktima gikan sa Mactan Export Processing Zone sa Lapulapu City paingon sa Mandaue City, dihang pag-abot niini sa Hernan Cortes street, mideklarar siyang tulis.

Si Surban miingon nga iya lang gilipat ang mga pasahero sa tudlo niyang gipagawal maorag armas de fuego nga gisampungan sa iyang T-shirt.

Sa kahadlok ni Navecilla, milayat kini sa jeep agi sa bintana nga maoy hinungdan sa pagkapantok sa iyang ulo sa karsada.

Si Surban wala usab molampos sa iyang pagpanulis kay nasikop kini sa usa ka polis nga nagsunod sa sakyanan nga iyang gitulis.

Maoy hinungdan nga imbis robbery with serious physical injuries ang gipasakang kaso kaniya, giusab sa kapolisan og robbery with murder ang maong kaso aron labing mobug-at ang silot nga ipahamtang batok sa maong suspetsadong tulisan. (Romeo T. Limpangog) (BANAT NEWS)