Trak nabalintong drayber angol

Cebu - Naangol ang usa ka drayber sa trak de karga, ug nagusbat usab ang usa ka balay dihang nabalintong ang iyang sakyanan didto sa Carmen Village dakbayan sa Talisay kagahapon sa alas 2:00 pasado sa hapon.

Ang biktima mao si Mauricio Filipino Lapuz, hingkod, ug nagtrabaho isip drayber sa Geo Transport.

Matud pa sa biktima nga nakurat siya dihang may tawo nga mikalit og labang sa karsada ug sa kalit usab niya nga pagpreno nawad-an sa panimbang ang sakyanan hinungdan nga nabalintong kini hangtod ngadto sa usa ka balay sa daplin sa karsada.

Gipaabot ni Emilia Arcilla, 50, tag-iya sa balay nga bayran siya sa kompaniya nga gitrabahoan ni Lapuz nga mao usab ang tag-iya sa de kargang nabalintong.

Gihiling usab sa doktor ang utok ni Lapuz kun wala ba kini mokago kay maayo kining pagkaparok sa sandiganan sa sakyanan atol sa pagbalintong niini. – BANAT NEWS