Room boy sa hotel imbestigahon

Cebu - Gitakdang imbestigahon sa kapolisan ang mga room boy sa usa ka hotel diin mapalgi ang patay'ng lawas sa usa ka call center agent nga gisulod sa sako niadtong miaging adlaw.

Kini human mogawas ang cartographic sketch sa posibleng killer sa biktima.

Ang taga homicide section uban sa Investigation Detection and Management Bureau(IDMB) sa Mandaue City Police Office maoy mo-imbistigar sa nahisgutang mga room boy.

Base sa maong cartographic sketch nahulagway dinhi ang usa ka babaye nga giila sa kapolisan nga Edna kinsa gituohang maoy principal nga suspetsado sa maong krimen.

Sa sayo pa kini si Edna, kinsa nagpaila nga usa ka Tina Panganiban maoy giingong   nagpareserba sa Room 309 sa Nikkie Garden Hotel sa Hernan Cortes Avenue, barangay Subangdaku, Mandaue City sa miaging semana. 

Si Inspector Leo Casul sa Crime on the Scene Operation (SOCO) maoy nagsugyot nga ipa-imbistigar ang mga room boy nga mihinlo sa lawak diin mapalgi ang lawas patay ni Lyn-vi Ebarita, usa ka call center agent .

Nasayran nga bisan wala pa moabot ang mga imbistigador sa SOCO gidalidali dayon paglimpyo sa mga room boy ang lawak 309 busa ang mga otoridad wala nay nakita nga mga ebidensya nga posibleng makahatag kanila og lead sa kaso.

Nasayran nga ang mga room boy mibutyag ngadto kanila ni Inspector George Aneñon nga ang garbage bag nga gisudlan sa patay’ng lawas ni Ebarita wala nila masayri nga gibutang sa luyo sa sliding door sa lawak.

Sa pagtuo nga mi-checkout na ang kustomer sa maong lawak, giilisan dayon sa mga roomboy og bedding ang katre niini pamasin nga may laing kustomer nga mopuli pag-check-in sa maong lawak. 

Ang hilabihan kabaho sa maong lawak maoy nakaaghat kanila sa paghimog pakisusi ug didto nila masayri nga ang baho naggikan sa gibiling garbage bag sa likod sa sliding door.

Gisusi karon ang finger prints sa mga basiyo sa botelya sa sulod sa lawak pamasin nga mailhan sa mga imbestigador ang mga suspetsado nga nagpatay sa biktima. – BANAT NEWS