Misampak sa signboard sa Lapulapu usa namatay

Cebu - Patay ang usa ka wala mailhing lalaki samtang naangol usab ang drayber sa usa ka motorsiklong misampak sa signboard nga gipanag-iya sa Lapuapu City Government sa sitio Panas, barangay Suba sa maong dakbayan kagahapon sa kaadlawon.

Si Miano Cabao, 20, nga nagpuyo sa barangay Ibabao lungsod sa Cordova nagmaneho sa iyang motorsiklo uban ang wala pa mailhing angkas niini nga namatay.

Sumala pa sa imbestigasyon sa kapolisan kusog kaayo ang dagan sa maong motor gikan pa sa Marigondon padulong na sa Cordova dihang kalit kining nasampak sa maong signboard hinungdan sa naangkong kadaot sa ilang kalawasan.

Ang duha gidala sa mga sakop sa Emergency Rescue Unit Foundation ngadto sa Lapulapu City District Hospital apan gideklarar nga dead on arrival ang kauban ni Cabao, samtang ang naulahi gibalhin sa Vicente Sotto Memorial Medical Center. – BANAT NEWS