Random drug test sa tinun-an dako'g matabang - Magbabalaud

Cebu - Nakadawat og paborableng suporta gikan sa magbabalaud ang init kaayong isyu karon dinhi sa nasud nga random drug testing sa mga tinun-an sa high school.

Si Cebu City South District Rep. Antonio Cuenco mipadayag nga angayang madayon ang giduso sa Dangerous Drugs Board (DDB) ang random drug test sa mga tinun-an sa sekondarya mapa-public ug private high school man lukop nasud.

Matud pa ni Cuenco maayo ang tumong niini ug makatabang pagpakunhod sa ilegal nga drugas basta subayon lang ang tukmang proseso pagpahigayon niini aron dili makasugat sa pag-kwestyon sa legalidad niini.

Kini sama sa pag-ila gyud kung si kinsa nga mga estudyante ang i-drug test, si kinsa ang mohimo niini ug uban pa tungod kay nasayod si Cuenco nga dunay mga tinun-ang di gyud mosugot niini tungod sa personal nga rason.

Kinahanglang boluntaryo ug may pagtugot sa ginikanan ang maong drug test.

“Nagtuo ko nga dunay mga pilosopong estudyanteng mo-kwestyon niini nga mo-invoke na hinuon sa ilang rights to self-incriminations nga kabahin sa ilang constitutional rights,” padayag pang Cuenco.

Sa iyang bahin, si Bokal Victor Maambong sa Hunta Probinsyal mipadayag usab og suporta niini apan kinahanglang estriktuhon ang guidelines pagpatuman niini.

“While the random drug testing is commendable and worthy of support, the DDB still has to assure the anxious public that it has set in place a foolproof safeguards to preclude negligence or malicious machinations aimed at incriminating innocent students,” sumala pa sa majority floor leader sa Hunta.

Matud niya kun walay estriktong guidelines maguba ang integridad sa maong katuyoan tungod kay pahimuslan lang unya kini sa uban.

Samtang si Dangerous Drugs Board undersecretary, Clarence Paul Oaminal mitug-an sa Banat News nga giplantsa pa ang maong laraw ug makig-coordinate pa sila sa mga tag-iya ug administrators sa mga tunghaan.

Kini aron ibutang sa handbook sa maong mga tunghaan ang random drug testing panahon nga mo-enroll.

Nagtuo siyang pinaagi niini mas daghan pa unyang mga tinun-an nga malikay sa paggamit sa illegal nga drugas, ug kadtong masakpan, subay sa RA 9165 ipailawom dayon sa rehabilitasyon. – BANAT NEWS