73-anyos gipuspusan patay

Cebu - Wala na mahitsura ang ulo sa usa ka 73-anyos nga traysikad driver human kini mabungkag ug gituohang gibunalan og magahing butang sa sitio Bulubugan barangay Tajao lungsod sa Pinamungajan niadtong Biyernes sa alas 7:00 sa buntag.

Ang namatay giila sa kapulisan nga si Amado Moreno kansang lawas nagsugod na og gahi dihang napalgan sa iyang apo nga naglunang sa kaugalingong dugo.

Pag-abot sa mga polis gikatahong nagusbat ang ulo niini nga napuno sa daghang samad ug gituohang agi sa magahing butang nga gipuspos kaniya makadaghang higayon nga nakaingon sa hinanali niining kamatayon.

Sa gidusong report ni SPO2 Allan Tundag sa Pinamungajan Police Station diha sa Operation sa Cebu Provincial Police Office ang apo sa biktima nga maoy nakakita nga nagbuy-od na diha sa atubangang bahin sa ilang panimalay si Moreno.

Gituohan sa kapulisan nga namatay ang biktima unom ka oras una pa kini na diskubrehan sa apo   ang patay'ng lawas niadtong Biyernes sa buntag.

Si PO1 Gilfred Baroman sa Pinamungajan Police Station nga gikahinabi sa Banat News nitug-an nga duna na sila karo'y gisubay’ng anggulo sa kamatayon sa biktima.

Matud pa niini nga dako ang ilang pagtuo nga nanimalos lang ang suspetsado sa biktima human ang anak niining ginganlan og “Bolantoy” ang nagtago-tago gumikan kay nakapusil kini sa niaging tuig.

Gipadayag niini nga gipangita na nila karon ang suspetsado kinsa napusilan sa anak sa biktima kini human matud pa wala usab kini mo-report sa kapulisan dihang gipusil kini ni Bolantoy. – BANAT NEWS