Habal-habal regulahon bisan ...

Cebu - Taliwala sa pagsupak sa Land Transportation Office suportahan ni acting Mayor Michael Rama ang planong pagpalabang og ordinansahon sa City Council nga mag-regulate sa operasyon sa habal-habal sa siyudad.

Ang LTO misupak niini tungod sa Akta Republika 4136 nga nagdili sa paggamit og motorsiklo isip pasaheroan tungod sa risgo niini ngadto sa mga sumasakay.

Apan matud ni Rama nga angayan nang i-regulate ang mga habal-habal tungod kay walay gihimo ang nasudnong kagamhanan labot niini.

“Wala may nag-atiman pag-usab anang national law, so, kitay mag-una ana aron balihon nato, dugay ra kaayo na nga nanginahanglan og pagtagad,” sumala ni Rama.

Si Konsehal Sylvan Jakosalem maoy gipaabot nga moduso sa proposal ngadto sa City Council pinaagi sa paghingalan na usab unya niini og single taxi ug usa na lang usab unya ka pasahero ang itugot nga pasakyon sa mga habal-habal sa higayon nga mahingpit na ang ordinansa.

Ang maong lakang gipahaom usab sa konsehal sa nasudnong balaud nga nagtugot lang pagpasakay og duha ka tawo sa motorsiklo.

Kini wala hinuon mauyuni ni Rama uban sa pagtuo nga makasugat usab og hugot nga pagsupak ang maong lakang sa mga driver ug operators niini.

 “Lisod kaayo na nga tumanon, dili unya magamit nang ordinansaha, I want even that thing to be questioned kay aron maabot na sa Supreme Court,” nagkanayon si Rama.

Gusto sa acting mayor nga ang labaw'ng hukmanan maoy modesider kung ang habal-habal usa ba ka illegal nga matang sa transportasyon.

Kini tungod kay giingong dili malalis nga ang habal-habal maoy alternatibong kasakyan sa mga dapit nga dili masulod sa ubang publiko nga mga sakyanan. – BANAT NEWS