Lahug vs. Bo. Luz resolbahon na

Cebu - Resolbahon na sa konseho sa dakbayan sa Sugbu ang panagsungi tali sa barangay Lahug ug Barrio Luz labot sa ilang utlanan nga hangtud karon wala pa gihapoy katin-awan sa duha ka barangay.

Si Konsehal Gerardo Carillo, chairman sa Committee on Three sa City Council nga maoy mihilot sa maong kasungian nagkanayon nga pakigtagboan niya karong semanaha ang mga representante sa duha ka barangay.

Kini aron sila paminawon sa matag diskusyon ug pagpakita sa ilang mga kamatuoran nga sila maoy nanag-iya sa mga dapit nga ilaha karong giilugan.

Giilugan sa duha ka barangay mao ang dapit nga nahimutangan sa Waterfront Hotel ug Grand Convention Center diha sa Archbishop Reyes Avenue.

Pakyas ang barangay Lahug ug barrio Luz pagkab-ot og kasabutan hinungdan nga mopakanaog na og desisyon ang konseho.

Matud ni Carillo nga kung dili matagbaw ang usa ka habig sa makab-ot nga hukom sa City Council, kini mahimo nga modangop ngadto sa korte.

Nasayran nga ang City Planning and Development Office (CPDO) nipabor sa pangangkon sa barrio Luz nga hugot usab nga gisupak sa barangay Lahug.

Nagduda si Lahug Barangay Captain Mary Ann delos Santos nga kini may bulok politika tungod kay siya sakop sa oposisyon sa siyudad.

Kahinumduman nga ang kapitan nakig-atbang ug napildi ni mayor-on-leave Tomas Osmeña sa miaging piniliay niadtong tuig 2007.

Una nang nibahad si delos Santos nga dili magduha-duha pagdangop sa hukmanan kung ang konseho adto modapig sa Barrio Luz.

Gisandigan sa kapitan sa ilang pangangkon ang resolusyon sa konseho niadtong 1965 ug 1966 nga naglatid sa utlanan sa duha ka barangay.

Gihangyo sa mga opisyal sa Lahug ang mga sakop sa City Council nga respetuhon ang territorial jurisdiction sa ilang barangay. – BANAT NEWS