P.5M alahas, kabtangan gisakiyo sa mga kawatan

Cebu - Tulo ka panimalay ang gilungkab ug nasakiyo ang kapin tunga sa milyong salapi ug gamit sa duha ka panimalay sa dalan V. Rama Ave. eskina B. Rodriguez barangay Sambag 2 ning dakbayan pasado alas 12 sa buntag ug sa lungsod sa Medillen.

Si Susan Uriarte Valmayor, residente sa maong dapit midangop sa Theft and Robbery Section human madiskubriheng gisulod ang iyang balay diha sa Sambag 2 sa wala mailhing tawo ug gisakiyo ang iyang mga gamit nga mokantidad og kapin sa tunga sa milyon.

Sa imbestigasyon nila ni SPO1 Mario Pasuelo miagi sa likod nga bahin sa balay sa biktima ang mga kawatan pinaagi sa pagguba sa luyong pultahan.

Nadala sa mga kawatan ang 400 dolyares; laptop nga nagkantikadad og P80 mil; bracelet nga panglaki nga nagkantidad og P50 mil; duha ka bracelet nga pangbabaye nga nagkantidad og P25 mil matag usa; usa ka diamond ring nga nagkantidad usab og P25 mil; duha ka kwentas nga nagkantidad og P175 mil; tulo ka pendant nga nagkantidad og P435 mil; bracelet nga adunay perlas nga nagkantidad og P20 mil; relo nga tag P25 mil ug nagkalain-laing mga klase sa alahas nga nagkantidad og P95 mil.

Ang kapolisan sa Theft and Robbery Section padayon pa karung nag-imbestigar kung wala bay inside job nga nahitabo sa maong lugar.

Samtang usa ka wala mailhing kawatan usab ang misaka sa usa ka panimalay sa barangay Dayhagon lungsod sa Medellin niadtong miaging adlaw pasado alas 11:30 sa gabii ug misakiyo sa mga gamit nga nagkantidad og P89 mil.

Ang biktima mao si Gema Argonido, 44, lumolupyo sa nahisgutang lugar kansang laptop nga nagbalor og 59 mil ka pesos ug Sony digital cam nga nagbalor usab P30 mil ka ang nadala.

Nahinabi sa Banat News si PO3 Paquito Son mibutyag siya nga ang suspetsado nakasulod sa maong panimalay pinaagi sa pagkatkat sa maong kural ug gipanangtang ang bintana ug diha milusot.

Dugang pa niya nga hinanok kaayo ang biktima maong wala kini nakabantay nga adunay misulod   sa iyang panimalay.

Nakit-an sud diha sa panimalay sa biktima ang usa ka motor, kolor blue ug walay plate number nga gidudahang maoy gisakyan sa suspetsado.

Human sa hitabo gidudahang misulod usab ang maong grupo sa panimalay sa usa ka Arnulfo Pongtan diha agi sa buslot sa abuhan sa kusina ug misulod ang usa ka suspetsadong dakuon og lawas ug itumon ang pamanit sa lawak sa 17-anyos nga anak sa tagbalay nga si Liezel ug gikuha ang cellphone niini.

Apan gikatahong nakamatikod ang dalagita maong dali siyang gitiunan sa suspek og kutsilyo nga bronse dayong bahad sa pag-ingon og “ayaw pagsaba kay patay gyud ka.”

Ang dalagita wala mosinggit apan misiko sa bungbong maong nakamata ang amahan niini nga si Arnulfo ug nangutana sa anak hinungdan nga mikaratel og gawas ang maong lalaki.

Atol sa pagsusi sa palibot narekober ang digital camera ni Argonido ug tulo ka paresang tsinelas ug sinina apil na niini ang pangbata. - Guam Logroño uban sa report nila ni Lesley Caminade ug Rica Calinawan (BANAT NEWS)