Call center agent giluba 24 ka higayon

Cebu - Nakabaton og 24 ka mga samad dinunggaban sa kalawasan ang babayeng call center supervisor nga napalgang patay nga gisulod sa usa ka garbage bag diha sa room 309 sa Nikkie Garden Hotel.

Kini maoy migawas nga resulta sa gihimong autopsy sa patay’ng lawas ni Lyn-vi Ebarita, 26, nga gihimo sa PNP Crime Laboratory sukwahi sa unang pagtuo sa kapolisan nga duha ray samad dinunggaban niini diha sa dughan ug sa bitiis.

Nagtuo ang kapolisan nga giplano nang daan sa mamumuno ang pagpatay sa biktima sanglit nakaandam man kini daan og plastic garbage bag nga itom ug mga packaging tape nga maoy gipang-impake pagputos niini.

Sila si Inspector George Aniñon nga maoy nakatubag sa maong alarma ang nakamatikod sad nga gilimpiyuhan na sa mga mamumuno ang crime scene ug walay nakaplagang hinagiban gawas sa mga botelya sa beer nga ilang gikuhaan og fingerprints.

Si PO2 Ramil Lim nga nahinabi sa Banat News miingon nga ang love triangle mao ang nag-una sa mga anggulong ilang gisubay karon.

Gipatawag na ang mga kaila, kauban sa trabaho ug kabanay ni Ibarita aron masubay kung si kinsa ang babayeng kauban sa biktima diha sa maong lawak nga unang giilang si Edna, apan sa registration form diha sa front desk gituohang nangalyas kini og Tina Panganiban.

Sa nasayran nga nadiskubrehan ang patay’ng lawas sa biktima sa sulod sa lawak sa nahisgotang hotel human usab sa pagpangalisbo sa baho nga maoy nakaingon sa pag-reklamo sa mga guest nga ang lawak nahimutang sa tupad niini.- BANAT NEWS