Pintor nga 'esnatser' nakombikto sa illegal drugs

Cebu - Gikonbikto sa korte ang usa ka pintor sa kasong paghupot og ilegal nga drugas human nakapresentar ang prosecution og lig-ong mga ebidensiya batok kaniya.

Ang gikonbikto ni RTC-7 Judge Grabriel Englis mao si Mark Delgra, 23, residente sa lungsod sa Minglanilla ug usa ka pintor ug may pending usab nga kasong pagpanglabni.

Gibasehan sa huwes ang testimonya sa mga polis sa Minglanilla gipangulohan ni PO3 Roland Camello kinsa nitumbok nga gisugo siya sa iyang labaw sa pagsilbe og warrant of arrest may kalambigitan sa kasong pagpanglabni batok sa nailang notadong snatcher sa lungsod nga mao si Mark Delgra.

Niadtong Agusto 4 tuig 2007, si Mark Delgra nadiskitaan nga nipalit og barbeque sa sitio Sangi barangay Calajoan lungsod sa Minglanilla apan sa ilang pag-abot nikalit og dagan si Mark Delgra apan nadakpan ra usab kini sa ginukdanay.

Nakuha gikan sa posisyon ni Mark Delgra mao ang usa ka hunting knife ug upat ka linikit nga nga Marijuana.

Wala hatagi og gibug-aton sa huwes ang pasangil ni Mark Delgra nga way gipakitang warrant of arrest ang mga polis ug ‘planted’ usab ang Marijuana aron modako ang iyang kaso.

Si Judge Englis nipahamtang og silot ngadtong Delgra pagkabilanggo gikan sa 12 ka tuig hangtud na sa 15 ka tuig ug pabayron usab ogP300 mil pesos. – BANAT NEWS