Gigulgol ang liog sa asawa

Cebu - Tungod sa grabeng selos giluglogan sa liog hangtud namatay ang usa ka ginang sa iyang bana sulod sa ilang balay atubangan sa ilang wala pay tuig nga anak sa barangay Poblacion-1, lungsod sa Tuburan kagahapon sa alas 11:00 sa buntag.

Ang biktima nga nagtu-ay na ang liog ug hapit na maputol tungod sa paggulgol ginamit ang kutsilyo mao si Wenna Comendador Salundaga, 21, lumad nga taga bukirang barangay sa Sumon apan nag-abang og balay sa maong lugar.

Samtang ang suspek nga bana mao si Renato Salundaga, 22, nga taga barangay Cabancalan ug usa ka habal-habal drayber daling miikyas ug gituohang nagpabukid aron motago.

Nasayran nga graduating na sa kursong education karung Marso sa Cebu State College of Science and Technology (CSCST) Tuburan Campus ang biktima.

Matud pa ni PO1 Pablo Arnoco sa Tuburan Police dihang nahinabi sa Banat News nga ang mga silingan sa managtiayon maoy nakabantay sa panag-away sa magtiayon gikan pa nianang sayo sa buntag tungod sa pagpunay og pangabubho sa bana.

Apan nianang pagkataud-taod kalit lang kining namingaw ug paglabay sa pipila ka mga gutlo nigawas sa balay ang bana ug dayung nisakay sa motorsiklo nga gi-parking sa silong ug mipasirit niini palayo.

Gikatahong gibaharan pa sa suspek ang mga silingang nanguryoso diha sa gawas sa pag-ingon kanila nga dili mag-apil apil tungod kay away nila kini sa pamilya.

Apan tungod sa kabalaka nga namingaw ang balay paglakaw sa suspek gisusi dayun nila ang balay ug didto ilang naabtan ang biktima nga nagbuy-od na sa lantay nga higdaanan nga nitu-ay na ang liog ug naglunang sa dugo.

Diha sa tupad niini ang wala pay tuig nga anak sa managtiayon ug ang kutsilyong gituuhang maoy gigamit sa bana pagpatay sa iyang asawa.

Ang igsuong babaye sa suspek pagkahibalo sa nahitabo daling miadto sa balay sa managtiayon ug gikuha ang bata samtang gihipos sa mga polis ang patay'ng lawas sa biktima.

Dugang nahipos nga impormasyon sa kapolisan gikan sa mga silingan nga kanunay nga mangabubho ang suspek sa biktima tungod kay kanunay kining magpaseksi kun mananina ilabina dihang nagsugod na kini sa iyang practice teaching.

Gituohan sab nga gilayog sa suspek ang biktima ug pagkatumba sa higdaanan nga lantay giyak-an kini ug diha pa giluglog ang liog sa kutsilyo hangtud nga namatay. – BANAT NEWS