Bag-ong kagawad sa Basak-Pardo nanumpa

Cebu - Nanumpa na isip ika-pitong barangay kagawad sa Basak-Pardo si Val Gallardo kagahapong adlawa sa buhatan ni Cebu City Acting Vice Mayor Hilario Davide III.

Kini human makakuha og kopya si Gallardo gikan sa Comelec en banc nga giingong nipalig-on sa desisyon sa hukmanan nga siya maoy midaog batok sa una nang naproklamar sa Comelec nga si Jojo Dela Cerna.

Si Dela Cerna nilabaw lang og lima ka botos atol sa miaging piniliay sa barangay ug kini wala dawata ni Gallardo uban sa pagpa-recount niini sa korte.

Sa gihimong recounting ni Judge Anatalio Necesario sa MTC Branch 2 nigawas nga si Gallardo nilabaw na usab og siyam ka botos kang Dela Cerna.

Dali nga niapilar si Dela Cerna sa maong desisyon ngadto sa Comelec-Manila apan kini gi-affirm sa maong buhatan niadtong Enero 9.

Tungod niini, wala maglangan si Gallardo pagpanumpa aron makalingkod na sa sunod nga sesyon sa barangay karong Pebrero 7.

Gipasalig ni Gallardo ngadto sa ilang mga konstituwente ang pagtabang niini sa higayon nga makasugod na sa iyang katungdanan.

Apan gitataw hinuon ni Kapitan Dave Tumulak nga dili pa nila i-acknowledge si Gallardo hangtud nga kini ideklarar sa Comelec nga ikapitong kagawad sa ilang barangay.

Sa iyang bahin dili pa mosibog si Dela Cerna ug labaw nang dili kini mobiya sa katungdanan isip konsehal sa ilang barangay ug naglaraw nga mosang-at og motion for reconsideration.

“Ang Comelec ni-affirm ra man sa desisyon sa MTC, wala pa may ruling nga siya na gyud, mosang-at pa gani ko og mosyon ngadto sa Comelec,” niingon si Dela Cerna. - Elly Bolonos (BANAT NEWS)