Lawas sa mananagat nabutha'g dinamita

Cebu - Nagusbat ang nawong, nabuslot ang dughan ug naputol ang tuong kamot sa usa ka mananagat ug naangol usab ang asawa niini human mabuthi sa dinamita nga maoy ilang gigamit sa illegal nga pagpangisda sa kadagatan sa barangay Daanlungsod, lungsod sa Medillen kagahapon sa alas 7:00 pasado sa buntag.

Ang namatay ug natagak sa dagat mao si Leodegario Godinez, 45, nagpuyo sa sitio Maharohay sakop sa barangay Daanlungsod samtang naangol ang asawa niining si Darlita, 44.

Matud pa ni PO3 Jovanne Placencia sa Medillen Police dihang nahinabi sa Banat News ang magtiayon nanagat sakay sa pumpboat sa maong lugar ug dihang nakakita sa bagang panon sa mga isda nikuha kini og dinamita dayung dali-dali nga gidagkutan apan aksidente kining nibuto sa wala pa niya malabay sa dagat.

Sumala pa sa mga saksi nga nakakita pagbuto, natagak ang lalaki human mabuthi sa dinamita ug naglutaw-lutaw nalang kini nga wala nay kinabuhi.

Ang mga polis nga sila si PO2 Paquito Son maoy miaswat ug midala kaniya sa baybayon diin gideklarar kini sa municipal health officer nga si Roilan Momongan nga patay na tungod sa grabeng kadaut sa lawas nga nahiaguman niini.

Samtang ang asawa niini gidali pagdala sa Severo Verallo District Hospital tungod sa mga paso sa nawong nga naangkon ug gibalhin sa tambalanan dinhi sa siyudad sa Sugbu.

Ang magtiayong Godinez dunay lima ka mga anak ug nagsalig sa ilang panginabuhian sa pagpanagat. - Darrel Carumba uban sa report ni Loraine Ebisa (BANAT NEWS)