Babaye gisu'd sa garbage bag

Cebu - Usa ka call center agent ang napalgang patay ug nadugta na sulod sa usa ka garbage bag diha sa usa ka lawak sa usa ka hotel sa barangay Subangdaku sa dakbayan sa Mandaue niadtong milabay’ng gabii.

Ang biktima giila sa kapolisan mao si Lynn-vi Ibareta, 26, taga barangay Cubacub dakbayan sa Mandaue ug giingong supervisor sa usa ka   call center dinhi sa Sugbu.

 Ang nakadiskubre sa patay’ng lawas sa biktima mao sila si Crecencio Angcay ug Arthur Asedesa, mga room attendants sa nahisgutang hotel human sumala pa mireklamo ang ubang okupante sa kabaho sa palibot duol sa room 309.

Dihang gisusi sa duha ang maong lawak mao nalay ilang gikakugang ang napalgang plastic bag sa basura nga gihiktan og masking tape diha sa gawas ug dihang ilang giablihan tawo kini.

Ang biktima wala nay sapot dihang giugkat sa mga mirespondeng sakop sa Homicide Section sa Mandaue City Police Office ug Scene of the Crime Operation.

Nasayran nga duna kini duha ka samad dinunggaban sa dughan ug usa sa bitiis nga gituohang maoy nakaingon sa hinanali niining kamatayon.

Wala pay matumbok ang kapolisan nga suspek sa maong linuog nga pagpatay.

Sa imbestigasyon ni Insp. George Aniñon ug PO2 Romel Lim sa Homicide section kang Morina Ybañez, ang front desk officer, kini nagkanayon nga usa ka Tina Panganiban nga taga A.S. Fortuna maoy uwahing mi-check in sa maong lawak niadtong Enero 18 sa ala-una sa hapon.

Ang maong babaye mitug-an nga kini nagtrabaho sa usa ka Teletech, usa ka call center dinhi sa Sugbu ug mihatag og cellphone number nga nadiskubrehan sa kapolisan nga iya ni Ibareta.

Sukad sa pagsulod sa maong babaye wala sad mabantayi kun kanus-a kini mi-checkout apan niadtong Enero 20 nakadesisyon ang hotel nga posibleng ni-checkout na gyud kini mga alas 11 sa gabii nianang adlawa.

Apan niadtong Huwebes sa gabii, mireklamo ang mga okupante sa kasikbit nga lawak tungod sa kabaho sa palibot ug dihang gisusi ang Room 309 mao nalay naabtan ang maong plastic bag nga gisudlan sa biktima.

Nasuta dihang gipakitaan sa hulagway sa biktima ang front desk wala kini makaila ug di usab kini mao ang dagway sa nagpailang Tina Panganiban, gani mismong mga kabanay niini nagkanayon nga dili agi sa kamot sa biktima ang sinuwatan diha sa registration form sa maong hotel.

Usa sa problema karon mao nga wala diay surveillance camera ang maong hotel nga sumala pa sa kapolisan dako unta og matabang sa pagsubay sa maong kaso.

Samtang sa laing bahin si PO2 Romil Lim sa kapolisan sa maong dakbayan nga nahinabi sa Banat News miingon nga may natala sa ilang blotter nga susamang pangalan sa biktima isip missing person.

Dugang pa niya ilang nasayran sa mga ginikanan nga nakatawag pa kini sa iyang cellphone atol niadtong Sinulog sa dakbayan sa Sugbo ug nagpahibalo nga naa siya sa Nikkie Garden Hotel kuyog sa mga higala. - Uban sa report ni Bong Soriano (BANAT NEWS)