Iranian national gipatay

Cebu - Usa ka Iranian national nga mianhi sa Sugbo aron pag-eskuwela sa kursong Biology nakaangkon og dinul-it nga samad pinusilan sa nawong ug nakit-an nga nagbuy-od sa Juana Osmeña Extension, Capitol Site ning dakbayan kagahapon sa kaadlawon.

Ang Iranian national nailhan nga si Ashkan Aminlan, 20, nanimuyo sa nahisgutang lugar, ug tinun-an sa BS Biology sa usa ka dakong unibersidad sa dakbayan. Nakit-an kining patay 100 metros gikan sa gipuy-an niyang panimalay.

Walay suspek nga nasikop o nailhan ang kapolisan, apan mitumaw ang pagduda nga kaubang Iranian lamang ang mipatay ni Aminlan.

Usa ka waiter sa usa ka kan-anan sa dakbayan sa Lapulapu nga nailhang si Marjon Peras maoy nakakaplag sa patay’ng lawas ni Aminlan.

Ang mga residente sa lugar miasoy sa kapolisan nga wala gyud sila makabantay og kagubot sa maong lugar, samtang wala usab makadungog og boto gikan sa armas.

Ang Homicide Section sa Cebu City Police Office mi-imbitar sa higala ni Aminlan nga si Khashayar Sirous, 24, nga usa usab ka Iranian national tungod sa posibleng kasayuran niini sa kamatayon ni Aminlan.

Si Sirous maoy kauban ni Aminlan sa wala pa kini makit-i nga patay na.

Sumala pa sa kapolisan nga si Aminlan ug Sirous nagkuyog kini nga nangaon sa usa ka fastfood chain sa dalan Escario.

Apan si SPO4 Alex Dacua nagkanayon nga si Sirous ug Aminlan nagkakuyog nga nag-inom sa usa ka sikat nga imnanan sa dalan Gorordo sa wala pa mangaon ang duha.

Si Sirous miasoy atol sa imbestigasyon nga human sila mangaon ni Aminlan, misakay siya og taxi paingong pauli sa iyang gipuy-an ug nakit-an niya ang iyang higalang si Aminlan nga naglakaw bitbit ang iyang pitaka.

Si Cebu City Police Office director Sr. Supt. Patrocinio Comendador mitug-an sa mga tigbalita nga duha ka anggulo ang sundon sa imbestigasyon sa kapolisan niining kamatayon ni Aminlan.

Kini, matud ni Comendador, mao ang love triangle ug pagpanulis.

Ang pitaka ni Aminlan nahanaw, apan ang iyang cellphone ug uban pang mahalong butang sa iyang lawas nakit-an pa sa kapolisan diha sa iyang lawas.

Si Aminhan nakaangkon og samad pinusilan sa iyang nawong. Gituohan nga gidul-it kini sa pagpusil tungod sa samad niini.

Atol sa imbestigasyon sulod sa Homicide Section, mitumaw ang komosyon human ang kauban ni Sirous nga laing Iranian national nasuko sa mga sakop sa media sa dihang gihangyong kuhaan og pamahayag.

Sa dihang gihangyo ang maong Iranian national, nanguha hinuon kini og hulagway sa mga sakop sa media ug hilabihang nakapanaway sa Pilipinas. Sa dihang giatubang sa cameraman sa usa ka estasyon sa telebisyon, misamot hinuon kini og yawyaw pagpanaway sa mga tawo sa Pilipinas ug dayong sibat human gibadlong.

Ang Homicide Section makig-alayon sa Theft and Robbery Section ug Investigation Detection and Management Bureau sa CCPO pagsulbad sa kaso. – BANAT NEWS