2 ka ex-officio member way labot sa 'pork barrel'

Cebu - Walay labot ang duha ka ex-officio member sa konseho sa dakbayan sa Sugbu sa hatagan og P3 milyones nga pork barrel funds tungod kay kadto rang mga konsehal sa siyudad.

Apan masaligon si ABC president Eugenio Faelnar nga mahatagan gihapon og pahat sa nahisgutang pundo sama sa gihimo ni Mayor Tomas Osmeña sa nangaging katuigan.

“Kahibawo gyud ko nga mahatagan ko ana pero wala lang ko masayod kung pila, dili lang pud ko moinsister nga apilan kay kahibawo man ko nga tagaan ko,” sumala ni Faelnar.

Gitataw sa ABC president nga siya dunay nahuna-hunaan usab nga mga proyekto ug programa sa kabarangayan nga nanginahanglan og pundo.

Sa iyang bahin nasayod na si Sangguniang Kabataan Federation (SKF) president Rengelle Pelayo nga dili siya makadawat sa pork barrel fund.

Apan malipayon lang gihapon ang SKF president tungod kay siya gipahibawo na nga hatagan ang ilang kapunongan og usa ka milyon ka pesos.

Alang kang Pelayo, ang maong pundo dako na og matabang sa ilang mga kalihukan.

“Dako gyud ko og pasalamat kay ang among budget gud mag-depend lang sa 2% annual dues sa mga barangay,” sumala ni Pelayo.

Planong gastuhan sa SKF president sa usa ka milyon ka pesos mao ang ilang adbokasiya alang sa kabataan ug uban pa. - Elly Bolonos (BANAT NEWS)