Pag-umangkon sa bokal naaksidente

Cebu - Patay ang kanhi barangay kapitan nga pag-umangkon ni Board Member Wilfredo Caminero samtang talandugon ang kahimtang sa duha ka mga sakay sa traysikol nga ilang gisakyan human dasmagi og sakyanan sa National Highway sa barangay Bulasa lungsod sa Argao niadtong Miyerkules sa alas 6:00 sa gabii.

Ang biktima nga dead on arrival sa Isidro Kintanar Memorial Hospital sa maong lungsod mao si Carmelo Cameniro Llorando, kanhi barangay kapitan sa bukirang barangay sa Linut-od.

Ang duha ka mga kauban niini mao ang drayber sa traysikol nga si Crisanto Talandon ug Rey Zamora Descatamento parehong nalandig sa tambalanan.

Ang drayber sa Isuzu Custom van nga kolor blue nga si Nepa Lexter Villacrusis, 21, taga Urgelio St., Sambag Uno siyudad sa Sugbo gitanggong na sa karsel sa kapolisan.

Matu ni SPO1 Jaime Mendoza sa Argao Police dihang nahinabi sa Banat News gikan sa pinuy-anan ni Mayor Edsel Galeos si Llorando sakay sa traysikol ni Talandon luwan ang laing pasahero nga si Descatamento padulong sa Taloot.

Gikatahong samtang nagdagan ang maong traysikol kalit kining nalimbuwad sa tunga sa karsada ug naatol nga nagsunod ang van hinungdan nga nadasmagan kini ug nadaro.

Tungod sa kakusog sa pagbangga nalukot-lukot ang sidecar diin si Descatamento ug Llorando nagsakay samtang nalabay ang drayber.

Ang mga estambay na maoy mitabang kanila sa tambalanan apan dead on arival si Llorando, samtang ang drayber sa van boluntaryong mitahan sa iyang kaugalingon sa kapulisan. - Darrel Carumba (BANAT NEWS)