Imbestigasyon sa 'Miss Cebu' gisugdan

Cebu - Nitukod na og komitiba si Cebu City Acting Vice Mayor Hilario Davide III nga maoy moimbestigar sa kontrobersiya sa Miss Cebu 2009.

Si Davide nga mao usab ang acting chairman sa Cebu City Tourism Commission (CCTC) maoy gitahasan ni Acting Mayor Michael Rama pagsusi sa kontrobersiya.

Kini dihang lain ang gitawag isip Miss Globe Texters Choice Award ug dili ang tinuod nga mananaug nga si Kimberley Therese Burden.

Bisan kung giangkon na sa mga organizers nga usa ka “honest mistake” ang nahitabo apan kini dili madawat sa pamilya ni Burden kinsa mi-resign sa pagka-second runner up sa Miss Cebu 2009 di palang dugay.

Matud ni Davide nga ang komitiba nga iyang gihulma panguluhan ni Konsehal Gerardo Carillo kinsa mao usab ang chairman sa Legal and Arbitration sa Sinulog Activities.

Ang maong komitiba maoy sangunan sa acting vice mayor pagpahigayon og fact-finding inquiry partikular na sa pagsuta sa sirkumstansya sa maong kontrobersiya.

Gipaabot nga duna nay resulta ang imbestigasyon human sa kinse ka adlaw, ug kagahapong adlawa gisugdan ni Davide ang pag-review sa tanang dukumento gikan sa CCTC nga may kalabutan sa pagpahigayon sa Miss Cebu 2009.

Gipasalig ni Davide nga walay mahitabong pagtabon sa himuong imbestigasyon ug patubagon ang si bisan kinsa nga nalambigit sa kontrobersiya.

“Kung dunay nasayop, then let the ash fall where it supposed to fall and there has to be some consequence para ma-preserve ang credibility sa commission (CCTC),” sumala ni Davide.

Sa nasayran, ang CCTC maoy tigpasiugda sa Miss Cebu nga nahimo nang kabahin sa mga kalihukan sa Sinulog matag tuig. - Elly Bolonos (BANAT NEWS)