Taxi nga way sequence no. dakpon

Cebu - Dakpon na sugod sunod bulan ang tanang mga taxi units nga mamasahero dinhi sa Central Visayas nga wala magpa-verify sa Land Transportation Franchising and Regulatory Board (LTFRB) aron maisyohan og 4 digit number sequence sa plaka niini.

Gipahibalo ni LTFRB-7 Regional Director Romulo Bernardez dihang nahinabi sa Banat News nga gitumong kini aron pagsumpo sa tanang mga kolorum nga taxi ilabina kadtong mga taxi units nga nakakuha og yellow plate sa Land Transportation Office (LTO-7) apan wala marehistro sa database sa LTFRB.

Matud ni director Bernardez kutob nalang petsa 31 karung bulana makapa -verify ang mga taxi operators aron maisyuhan og sequence number nga nagkantidad lang og P40.

Gipasabot ni Bernardez nga ikunsiderar na nilang illegal ug dakpon ang mga taxi units nga walay sequence number gikan sa ilang buhatan sugod sa petsa 1 karung bulan sa Febrero.

Sobra sa 5,000 ka mga taxi units dinhi sa Central Visayas ang nakapa-verify na sa ilang buhatan ug naisyuhan na niini.

Samtang gi-klaro sab ni Bernardez nga malangay pa ang pagpatuman sa meter receipt scheme sa mga taxi dinhi sa Sugbo tungod kay hangtud karun wala pa sila makadawat sa mga lagda niini. – BANAT NEWS