Drayber nabalia'g tiil

Cebu - Nabalian sa tiil ang usa ka drayber sa habal-habal dihang nadasmagan kini sa usa ka jeep didto sa sitio Kolo, barangay Tampaan, lungsod sa Aloguinsan niadtong miaging hapon.

Ang biktima mao si Mario Biton, 42, taga barangay Poblacion, Aloguinsan, samtang ang suspetsado nga nagmaneho sa jeep mao si Jojie Ayunan, 31, nga taga sitio Buli, barangay Langob, Asturias.

Sumala sa imbistigasyon, nasayran nga samtang nagtungas sa sakaon ug likoon nga bahin sa kurbadang lugar ang jeep nga gimaniho ni Ayuman, kalit lang misalta ang motorsiklo sa biktima taliwala sa karsada hinungdan nga maayong pagkasabak niini sa pangunahang ligid sa sakyanan ni Ayuman.

Kumo kay walay laing depensa, ang bitiis ug tiil sa biktima maoy gihimong panalipod niya sa iyang motorsiklo hinungdan nga wala mabalii ang motor apan ang iyang tiil maoy nabanggi.

Gidala sa Vicente Sotto Memorial Medical Center ang biktima samtang si Ayunan   nagpaabot nalang kun ikiha sa biktima. - Loraine Ebisa (BANAT NEWS)