Gipusil giluba patay

Cebu - Usa ka drayber sa traysikol gipusil ug giluba patay sa lungsod sa Dumanjug samtang sa lungsod sa Ronda may usa ka pamilya usab nga natulisan og kapin P60 mil sa miaging adlaw.

Ang drayber nga napusilan ug nalubaan patay mao si Leo Publico, 38, nga taga barangay Ilaya, Dumanjug, samtang ang suspetsado mao usab si Macario Bustamante Jr., 42, nga silingan sa biktima ug napriso dayon.

Nabiktima usab sa pagpanulis ang pamilyang Palanas sa barangay Ilaya, Ronda nga naglakip kang Alfredo Palanas, 65, iyang mga anak nga sila si Santiago, 30, ug Alfredo uban sa iyang umagad nga si Anabelle Palanas.

Si SPO1 Florencio Clarion sa Dumanjug Police Station mibutyag sa Banat News nga ang biktimang si Publiko giatangan sa suspetsado didto sa Ilaya ug gipusil lang kini og kalit, apan wala man mamatay giluba pa gyud niya sa iyang kutsilyo nga maoy hinungdan sa hinanali niining kamatayon.

Samtang ang pamilyang Palanas nahinanok pag-ayo sa pagkatulog dihang ang wala hiilhing mga tulisan nakasulod pinaagi sa pagguba sa sira sa ilang bintana ug nakuha ang ilang salapi ug mga alahas nga mibalor og kapin P60 mil.

Hangtod karon wala pa hiilhi sa kapolisan ang mga tulisan. - Rica Calinawan (BANAT NEWS)