Cebu - Namatay nang gikuha sa kapolisan ang usa ka barangay tanod ibabaw sa punoan sa lubi human gituohang giatake sa sakit sa kasing-kasing niadtong niaging Domingo sa buntag sa barangay Tinubdan lungsud sa Daanbantayan.
Ang namatay giila sa kapulisan nga si Felix Casinillo, 62, biyudo, barangay tanod sa nahisgutang lugar kinsa gisuwayan pa pagdala sa tambalanan apan gideklarar sa mga doktor nga dead-on-arrival.
Si PO1 Ramil Claro sa Daanbantayan nga gikahinabi sa Banat News nagkanayon nga ang kaubang tanod ni Felix nga si Pedro Buwanhog maoy nakakita niini sayo sa buntag.
Si Buwanhog mitug-an sa mga polis nga nianang Sabado sa hapon iyahang nakit-an si Casinillo sa ibabaw sa maong lubi nga nag-ubo ra apan wala niya kini sangpita.
Nahibulong nalang siya pagkabuntag pag-agi niya nga tua pa gihapon sa ibabaw sa punoan sa lubi si Casinillo ug mao gihapon ang posisyon hinungdan nga nagduda na siya ug kini iyang gisangpit apan walay tubag nga iyang nadungog.
Tungod niini dali siyang mipahibalo sa barangay ug si barangay kapitan Juanito Ybañez mao nay mipahibalo sa kapulisan.
Sila si SPO2 Nero Mansanares ug mga kaubanan nigamit og pisi ug gitunton paubos si Casinillo ug gidali sa pagdala sa tambalanan apan DOA na kini.
Gikatahong giatake sa sakit sa kasingkasing si Casinillo samtang kini nanguha og lubi. - Guam Logroño (BANAT NEWS)