Helper namatay sa sunog

Cebu - Usa ka 17 anyos nga lalaki namatay sa sunog nga nahitabo sa usa ka panimalay didto sa Poblacion-II, siyudad sa Carcar niadtong Lunes sa alas 7:50 sa gabii.

Ang namatay human makuryintihe mao si Mark Anthony Alesna, 17, helper sa pamilyang Dante Alcorisa, nga usa ka negosyante sa maong siyudad.

Matud ni FO1 Teodoro Lauglaug sa Carcar Fire Station sa dihang nahinabi sa Banat News nadawat nila ang alarma sa sunog alas 7:50 ug sulod lang sa 15 minutos nakontrolar nila ang kalayo nga wala na makatabok pa sa mga silingang panimalay ug sa merkado publiko sa maong siyudad nga nahimutang tupad sa nasunog nga panimalay.

Subay sa inisyal nga imbestigasyon sa kabomberohan subay sa mga pamahayag sa mga molupyo sa maong lugar, dunay usa ka boto nga mipaka sa maong panimalay ug misunod dayon ang pagkaylap sa kalayo hinungdan nga ang namatay nga biktima naningkamot kini nga masumpo ang kalayo nga nagsugod sa ikaduhang andana sa maong panimalay. Mikuha kini og tubig dayon gisabyag sa nagdilaab nga kalayo.

Wala makabantay ang biktima nga nakasaghid siya sa live wire nga giapil na og kaon sa kalayo niadtong higayona hinungdan nga nakuryentihan kini ug gidali unta pagtabang ug gidala sa tambalanan apan gideklarar kini sa mga doktor sa Carcar City District Hospital nga dead on arrival.

Matud ni FO1 Lauglaug wiring sa kuryente ang hinungdan sa sunog nga nagsukad sa usa sa mga lawak sa pamilyang Alesna apan padayon pang gisusi ang kinatibuk-ang danyos niini.

Hinuon ang ikaduhang andana lang sa maong panimalay ug wala mahurot og kasunog ang ground floor sa maong pinuy-anan human daling nakaresponde ang kabomberohan sa Carcar inabagan sa gipadala nga fire truck gikan sa kabomberohan sa lungsod sa Barili, Sibonga, Argao ug San Fernando. – BANAT NEWS