Leo: not guilty sa libelo ni Gwen

Cebu - Mi-plead not guilty ang station manager sa DyAB Leo Lastimosa atol sa arraignment sa kasong libelo nga gipasaka kaniya ni Gobernador Gwendolyn Garcia sa sala ni RTC-7 Branch 9 Judge Geraldine Faith Econg kagahapon sa hapon.

Ang abogado ni Leo Lastimosa niduso usab dayon og motion for dismissal sa kaso tungod kay dugay na kaayo kining gilumluman nga walay nahitabo.

Matud pa ni Lastimosa nga nadawat niya ang warrant of arrest niadtong Enero 2 sa miaging tuig ug gipalangay una sa korte, prosecutor ug ni Garcia og kapin sa usa ka tuig una pa gipapursige ang kaso batok kaniya.

Si Lastimosa nagkanayon nga kun wala pa siya makapiyansiya sa korte hayan magtingkagol siya sa bilanggoan sulod sa kapin sa usa ka tuig.

Nagtuo si Lastimosa nga giduwaduwaan lamang siya sa gobernadora pinaagi sa paglangay pag-ayo sa kaso nga nagpakita nga wala kini interest pagpa-prosecute sa kaso.

Giisip ni Lastimosa ang kalangay sa paglihok sa kaso nga dili makiangayon ug usa kini ka matang sa "denial of justice" sa iyang bahin.

Nagtuo siya nga aduna siyay lig-ong sukaranan ug basehanan nga i-dismiss ang maong kaso kay nagpakita nga walay interests ang Kapitolyo sa pagpadayon sa kaso o ba kaha walay lig-ong ebidensiya ang gobernadora batok kaniya pagpakonbikto kaniya.

Nanghinaot si Lastimosa nga pabiling objective ang mga huwes bisan paman nga gitugutang malangay pag-ayo ang iyang kaso sulod na sa kapin sa usa ka tuig. – BANAT NEWS