Cebu - Nabulit sa tinigbasan ang lawas sa usa ka manghod dihang giligid kini og tigbas sa pinuti sa iyang maguwang kay na-aan nga namato sa ilang balay didto sa sitio Sambagan, barangay Tabunok, dakbayan sa Talisay kagahapon sa kaadlawon.
Si SPO1 Oliver Dacua sa Talisay City Police Station miila sa biktima nga mao si Añano Cadigas, 34, nga taga Sambagan, samtang ang suspetsado mao ra usab ang iyang maguwang nga si Francisco Cadigas, 35, kaipon ra pagpuyo sa biktima.
Si SPO1 Dacua mibutyag sa Banat News nga sa wala pa ang maong hitabo ang biktima ug ang suspek nanag-inom ug dihang nangalasbag na namauli na sa ilang balay kay mangatulog.
Apan samtang nanghigda na sila, kalit nga gibato sa wala hiilhing tawo ang ilang balay maoy hinungdan nga mihiwasa ang suspetsado ug milanit sa niyang pinuti nga may tulo ka piyes ang gitas-on.
Migawas kini sa ilan g balay kay gipangita ang tawong namato ug walay kalibotan nga misunod kaniya ang biktima aron suportahan ang iyang maguwang kon magkinaunsa.
Apan malagmit, sugo sa kalasbag, wala na magkainilhanay ang managsoon sa ngitngit nga bahin sa palibot sa ilang balay hinungdan nga walay tingog-tingog pagkakita sa suspek sa tawo nga diha sa iyang palibot giligid kini og tigbas. - Loraine Ebisa (BANAT NEWS)