Cebu - Usa ka lalaking piniriso nga giingong naguol gumikan sa iyang kasong rape misuway sa pagpakamatay pinaagi sa paglaslas sa iyang pulso sulod sa karsel sa Alcantara Police Station niadtong Lunes sa kaadlawon.
Ang naglaslas sa iyang walang pulso giila sa kapulisan nga si Francisco Valiao Sr. 45, taga barangay Polo sa nahisgutang lungsod nakit-an nalang sa mga police nga nagkadugo sa iyang walang pulso.
Base sa report sa kapulisan sa lungsod sa Alcantara ala-una pasado sa kaadlawon niadtong Lunes nipahigayon sila og routine inspection sa selda.
Nakugang nalang sila nga may nagbanaw nga dugo sa salog ug mao nalay nakit-an nga naggikan kini sa walang pulso ni Valiao hinungdan nga ilaha kining gidali og pagawas ug gidala sa tambalanan ug luwas na ang kahimtang.
Pipila ka semana na ang nakalabay usa ka piniriso sa kapulisan sa lungsod sa Minglanilla nga gikasuhan og child abuse sa silingan ang misuway usab og hikog pinaagi sa paglubid og habol sa iyang liog ngadto na sa rehas apan naabtan sa mga polis ug nadala sa tambalanan. - Guam Logroño (BANAT NEWS)