2 supporters ni Baquerto gikiha kay namusil

CEBU - Pormal nang gipasakaan og kasong multiple frustrated murder ang duha ka mga tawo ni Tudela Mayor Rogelio Baquerfo tungod sa pagsulay sa pagrapido sa upat ka mga sakop sa karibal sa politika nga si Mayor Demetrio Granada.

Ang gipasakaan og kaso sa kapolisan sa Tudela Police station ngadto sa Provincial Prosecutors Office mao si Riste Rodrigo, 27 ug Ricky Borgon, 34, residente sa maong lungsod.

Nasuta nga si Rodrigo nabalhog na sa Cebu Provincial Detention Rehabilitation Center tungod sa kasong murder apan lumad nga taga Dalaguete ug kasamtangang nagpuyo sa rest house ni mayor Baquerfo sulod pa lamang sa duha ka semana ug si Ricky Borgon, 34 anyos,minyo lumad nga taga Carajay, Lapu-lapu city apan kasamtangan nagpuyo sa McArthur, Tudela, Camotes, pulos mga job order employees ni Baquerfo.

Samtang ang mga kihante mao sila si Jade Goc-ong, 35; Joel Loon, 37; Benjie Argumendo, 20, ug si Cresencio Largo, 43, pulos lumad nga taga Tudela ug pulos mga job order employee sad ni Granada.

Sigon sa sinumpaang pamahayag sa mga reklamante buntag niadtong miaging Biyernes miadto sila sa plaza aron sa pagpasugod na sa pagpanilhig sa dihang kalit lamang miabot si Rodrigo nga may dalang Ingram ug dayong pusil kanila.

Makausa na hinuon kini nakabuto sanglit mikagar kini ug wala say naigo kanilang maong mikaratil sila sa pagdagan.

Ila usab nga nakit-an nga gitunol ni Riste Rodrigo ang Ingram ngadto kang Ricky Borgon ug nisaka dayon sa buhatan ni Bacquerfo sa munisipyo.

Si Borgon nasakpan sa akto ni SPO3 Edison Torres nga nagbitbit sa maong armas nga may 12 ka buhing bala sa .9mm pistol sulod sa usa ka magazine, samtang si Rodrigo nasikop dihang nisulay og sibat sakay sa usa ka van ni Baquerfo.

Ang mga reklamante niingon nga politika ang nagpaluyong motibo sa pagsulay pagpusil kanila, apan kini gipanghimakak sa duha tungod kay ang maong kaso tumotumo lamang sa mga tawo sa kaatbang sa politika sa ilang amo. (BANAT NEWS)