Motan-aw'g Sinulog namatay

CEBU - Namatay ang usa ka lalaking nakuyapan samtang padulong motan-aw ug mosuroy-suroy sa Sinulog diha sa may Legaspi Extension sa barangay San Roque kagahapon pasado alas 7 sa gabii.

Ang namatay giilang si Ruben Apas, 32, lumulopyo sa nahisgutang lugar kalit lang natumba sa dalan.

Usa ka Mira Apostol, 32, taga sitio Puntod Alaska barangay Mambaling kinsa naglakaw usab sa maong dapit ang daling mitabang kaniya ug mitawag og polis diha sa Waterfront Police Station.

Ang mga grupo sa Emergency Rescue Unit Foundation dali usab nga midala kang Apas sa Cebu Doctors Hospital apan gideklarar kining dead on arrival.

Gituohang giatake sa sakit sa kasing-kasing si Apas hinungdan sa iyang kamatayon.

 Ang patay’ng lawas sa biktima kasamtangan karung gidala sa Saint Francis Funeral Homes alang sa dugang pa nga eksaminasyon.