3 naghantak gipriso

Cebu - Natingkagol karon ang tulo ka sugarol diha sa Talisay City detention cell human kini masikop sa kapolisan kay naghantak didto sa sitio Dawis, barangay San Roque, dakbayan sa Talisay kagahapon sa kaadlawon.

Ang mga suspetsado giila sa mga polis nga sila si Randy Refuela, 36, taga Ward II, lungsod sa Minglanilla, Randy Biana Jr, 31, ug Roberto Mingueto, 40, pulos taga Dawis.

Nasakmit sa mga polis gikan sa mga dinakpan ang mga 25 centavos nga panalang lakip na ilang pusta nga kwarta nga bali og P147.

Si PO3 Edwrin Alvarado, duty desk officer sa Talisay City, Police Station mibutyag sa Banat News nga sa sayo pa nakadawat sila og taho gikan sa usa ka molupyo bahin sa paghitak sa ilegal nga sugal diha sa San Roque.

Matud pa sa maong taho nga gibati og kabalaka ang mga molupyo sa maong barangay kay midagsang ang kinawatay nga gipasangil nila sa naghitak nga sugal sama sa hantak ug uban pa diha sa maong lugar.

Gumikan sa maong taho, abtik kaayo ang kapolisan nga miresponde niini aron masanta ang mga sugal nga ilegal.

Sila si SPO3 Joel Wenceslao, PO2 Alan Villazuda ug PO1 Francisco Gorosin maoy misunggaw sa mga sugarol nga nagyaka palibot sa batong antogan.

Didto naabtan nila sa akto ang tulo nga diha gyud sa kilid sa antogan ug ang ubang nakaamgo sa pag-abot sa kapolisan mikaratel og panagan hinungdan nga tulo ray ilang nasikop kay wala dayon makasibat.

Ang kaso sa paglapas sa balaud bahin sa ilegal nga sugal maoy gipasaka batok sa mga dinakpan kinsa nagpahayahay karon sa bugnaw kaayong prisohan sa Talisay. – BANAT NEWS