76 ka patay wa ilhi

Cebu - Mokabat pa sa 76 ka mga patay’ng lawas nga mga biktima sa bagyong Frank niadtong Hunyo 21 sa miaging tuig ang wala pa makuha sa mga tagtungod hangtod karon sumala pa ni Doctor Renato Bautista, ang hepe sa National Bureau of Investigation-Disaster Victim Identification (NBI-DVI).

Matud ni Bautista nga 63 niini anaa sa Cosmopolitan Funeral Homes samtang laing unom tua sa Bantayan ug dugang pito usab ang nagpabilin didto sa siyudad sa Cadiz.

Wala pa kuhaa sa mga tagtungod ang nahisgutang mga patay’ng lawas tungod kay kini giingong wala pa usab mailhi sa NBI-DVI gumikan sa kakuwang sa Deoxyribonucleic Acid (DNA) samples matud ni Bautista .

Wala pa usab matino kung ang maong mga patay’ng lawas kabahin ba sa mga biktima sa nalunod nga M/V Princess of the Stars.

Nunot niini subling nanawagan si Bautista sa mga pamilya sa nagpabiling missing sa bagyong Frank nga magpakuha og DNA samples.

Ang wala pa mailhing mga patay’ng lawas maoy kabahin sa 307 nga unang gidala dinhi sa dakbayan human sa bagyong Frank.

Samtang ang ikaduhang batch sa mga patay’ng lawas nga giugkat gikan mismo sa nalunod nga M/V Princess of the Stars padayon pa nga gi-examine sa mga forensic experts.

Gipahibawo ni Bautista nga sa 199 ka body bags nga gidala dinhi sa dakbayan gikan sa Sibuyan Island didto sa Mindoro, upat pa lang niini ang ilang nakompirmar.

Gipasalig hinoon sa labaw sa NBI-DVI nga sa mosunod nga mga semana, dugang mga biktima sa nalunod nga barko ang ilang maila.

Sa pikas bahin giklaro ni Bautista nga wala silay plano nga ipahigayon ang mass burial o mass cremation sa mga patay’ng lawas nga dili kuhaon sa mga tagtungod.

Gitataw ni Bautista nga ilang itugyan ngadto sa mga pamilya sa mga biktima kung unsay angayang himuon paghipos sa mga patay’ng lawas. – BANAT NEWS