Sto. Niño miduaw sa Mandaue

Cebu - Labing mabulokon ang pagbisita sa milagrosong imahen ni Senyor Santo Niño sa dakbayan sa Mandaue nga gihugopan sa mga debotos nga misalmot sa mga relihiyosong kalihokan gikan sa tibuok gabii nga pagbilar, pag-nobena ug hangtod na sa paghatod ngadto sa Ouano Private Wharf pinaagi sa usa ka foot procession.

Si Rev. Fr. Eduardo Cabog maoy midumala sa gipahigayong despideda mass sa miaging Biyernes sa kaadlawon ug gumikan sa kadaghan sa mga debotos misugwak kini sa simbahan ni Senyor San Jose sa barangay Centro sa maong dakbayan.

Sa iyang Homily ni Rev. Fr. Cabog, mipadayag sa milagro sa imahen ni Senyor Santo Niño nga nakapakabig sa ilang pagtuo sa pagdeboto niini.

Ang mga debotos wala gyud molunga ug padayon pa sa ilang pag-ambahan hangtod na sa foot procession paingon sa Ouano Private Wharf sa barangay Looc sa gipahigayong fluvial procession.

Bisan sa higpit nga pahimangno sa kapolisan sa pagdili sa katawhan sa pagpaboto og rebentador apan wala gyud kini patuo ug mipabuto gyud sa pipila ka mga balay sa dalan Catalino C. Ouano sa barangay Cambaro ug barangay Looc.

Ang laing wala kapugngi sa kapolisan mao ang pagdili sa mga debotos sa pagdala og balloon nga miresulta sa kalit nga pagboto dihang nasaghid sa kandila nga maoy nakaingon sa pagkapaso sa duha ka deboto nga babaye. – BANAT NEWS