Drug suspects abswelto

Cebu - Giabsuwelto sa korte ang duha ka gipasanginlang mga bigtime drug dealers nga nasikop sa gipahigayong buy-bust operation sa mga sakop sa National Bureau of Investigation kon NBI-7 nga gipangulohan na mismo sa ilang kanhi regional director.

Ang giabsuwelto ni RTC-7 Branch 14 Judge Raphael Yrastorza sa kasong pagpayuhot sa ginadiling drugas mao si Abner Fernandez ug ang minor de edad niing manghod tungod sa kapakyas sa pagtestigos sa gihimong poseur-buyer sa NBI.

 Nasayran nga niadtong May 26, 2003, ang NBI nga gipangulohan ni kanhi NBI-7 regional director Reynaldo Esmeralda nipahigayon og buy-bust operation sa Esperalta St. ning dakbayan kansang poseur-buyer mao ang usa sa agent sa NBI nga si Micheal Angelo Abarico.

Nasikop si Abner Fernandez ug ang 15-anyos niining manghod uban ang 13 ka paketeng shabu nga nitimbang og 56.5664 gramos, P500 nga marked money ug P100 nga gituuhang halin sa pagbaligya sa maong illegal nga drugas.

Apan si Yrastorza nagdumili sa paghatag og gibug-aton sa testimonya nila ni Atty. Renan Oliva ug Rommel Paglinawan pulos mga NBI agents tungod sila dili mao ang poseur-buyer.

Wala usab tagai og bili ang rason sa NBI nga dili makatestigo ang poseur-buyer nga si Micheal Angelo Abrico kay nadestino naman kini sa Davao Regional Office.

Tungod niini, gibasura sa korte ang kasong pagpayuhot sa ginadiling drugas batok sa managsuong Fernandez.

Samtang gimando usab ni Yraztorza nga kumpiskahon pabor sa gobiyerno ang nasakmit nga mga ebidensya ug sunogon sa labing daling panahon. – BANAT NEWS